ប្រែសម្រួល៖ស-សម្បត្តិ

ដោយរាំជាមួយនឹងកន្សែងពណ៌ក្រហមភ្លឺចិញ្ចាច និងរាំតាមចង្វាក់តន្ត្រីប្រពៃណី មនុស្សយន្តដែលមានរូបរាងដូចមនុស្សជាង១០នាក់បានឡើងលើឆាកធំបំផុតរបស់ប្រទេសចិនកាលពីខែមករា ធ្វើការសម្តែងដ៏គួរឱ្យចាប់អារម្មណ៍នៅក្នុងពិធីបុណ្យចូលឆ្នាំចិនប្រចាំឆ្នាំ។

ការសម្តែងដ៏គួរឱ្យកត់សម្គាល់នេះ ដែលមានអ្នកទស្សនាជាងមួយពាន់លាននាក់ គឺជាការរំលឹកដ៏ចាប់អារម្មណ៍អំពីការអភិវឌ្ឍដ៏ឆ្ងាយរបស់មនុស្សយន្តចិន។ ក្នុងរយៈពេលពីរខែកន្លងមកនេះ វីដេអូនៃមនុស្សយន្តចិនដែលអាចធ្វើចលនាដូចជាជិះកង់ ធ្វើកីឡា និងលោតបម្លែងខ្លួនបានកំពុងផ្ទុះនៅលើអ៊ីនធឺណិត ជារឿយៗត្រូវបានផ្សព្វផ្សាយដោយប្រព័ន្ធផ្សព្វផ្សាយរដ្ឋថាជាកត្តាជំរុញសំខាន់នៃកំណើនសេដ្ឋកិច្ច។

ទោះបីជាមនុស្សយន្តទាំងនេះភាគច្រើនមិនទាន់បានផលិតជាទ្រង់ទ្រាយធំក៏ដោយ ការប្រកួតប្រជែងជាមួយក្រុមហ៊ុន Tesla របស់លោក អេឡុន ម៉ាស ដែលជាអ្នកនាំមុខក្នុងវិស័យនេះ កំពុងកើនឡើង។ ការសន្យាអំពីអនាគត “I, Robot” ដែលម៉ាស៊ីនអាចធ្វើការងារផ្ទះ និងបម្រើជាអ្នកថែទាំ បានទាក់ទាញក្រុមហ៊ុនបច្ចេកវិទ្យាធំៗស្ទើរតែទាំងអស់នៅសហរដ្ឋអាមេរិក និងចិន ឱ្យវិនិយោគលើមនុស្សយន្តឬរ៉ូបូទិច។

ក្រុមហ៊ុន Microsoft, Nvidia និងស្ថាបនិក Amazon លោក Jeff Bezos បានវិនិយោគលើក្រុមហ៊ុនផលិតមនុស្សយន្តអាមេរិកឈ្មោះ Figure AI។ ចំណែកឯក្រុមហ៊ុន Meta កំពុងគ្រោងធ្វើការវិនិយោគយ៉ាងច្រើនលើមនុស្សយន្ត យោងតាមរបាយការណ៍របស់ Bloomberg កាលពីខែមុន។

លោក ម៉ាស ដែលមនុស្សយន្ត Optimus របស់លោកបានទាក់ទាញចំណាប់អារម្មណ៍ជាសកលតាំងពីការបង្ហាញខ្លួនដំបូងក្នុងឆ្នាំ២០២២ បានព្យាករណ៍កាលពីខែមុនថា គម្រោងនេះតែមួយគត់អាចបង្កើតប្រាក់ចំណូលជាង១០ទ្រីលានដុល្លារ។

ទោះបីជាអាចត្រូវការពេលប្រហែលប្រាំទៅដប់ឆ្នាំទៀតដើម្បីឱ្យមនុស្សយន្តមានឥទ្ធិពលពិតប្រាកដលើសង្គម ពួកវាអាចនឹងក្លាយជាឧបករណ៍អេឡិចត្រូនិកសម្រាប់អ្នកប្រើប្រាស់ដែលត្រូវបានទទួលយកយ៉ាងទូលំទូលាយបន្ទាប់ យោងតាមលោក Xi Ning សាស្ត្រាចារ្យនៃផ្នែករ៉ូបូទិច និងស្វ័យប្រវត្តិកម្មនៅសាកលវិទ្យាល័យហុងកុង។

ក្រុមហ៊ុន Goldman Sachs បានព្យាករណ៍កាលពីឆ្នាំមុនថា ទីផ្សារមនុស្សយន្តសកលនឹងមានតម្លៃ៣៨ពាន់លានដុល្លារត្រឹមឆ្នាំ២០៣៥។ ក្នុងរយៈពេលប្រាំឆ្នាំ ពួកគេប៉ាន់ស្មានថា មនុស្សយន្តចំនួន២៥០.០០០ឯកតា ដែលភាគច្រើនសម្រាប់ការប្រើប្រាស់ឧស្សាហកម្ម នឹងត្រូវបានដឹកជញ្ជូន ខណៈពេលដែលអ្នកប្រើប្រាស់នឹងទិញប្រហែលមួយលានឯកតាក្នុងមួយឆ្នាំក្នុងរយៈពេលប្រហែលមួយទសវត្សរ៍។

ទីក្រុងប៉េកាំង ដែលកំពុងព្យាយាមធ្វើការថ្លែងតាមជោគជ័យរបស់ប្រទេសចិនក្នុងទីផ្សាររថយន្តអគ្គិសនី (EV) ចង់ឈរនៅជួរមុខនៃកំណើននេះ។

ប្រទេសចិនមានបំណងរៀបចំប្រទេសឱ្យក្លាយជាមហាអំណាចបច្ចេកវិទ្យាសកល និងបន្តការរីកចម្រើននៃសមិទ្ធផលបច្ចេកវិទ្យាចិនថ្មីៗ ដូចជាគំរូហេតុផលរបស់ក្រុមហ៊ុន DeepSeek ដែលបានធ្វើឱ្យពិភពលោកភ្ញាក់ផ្អើលកាលពីខែមករា ជាពិសេសនៅពេលដែលសហរដ្ឋអាមេរិកកំពុងបង្រួមការរឹតត្បិតបច្ចេកវិទ្យាលើប៉េកាំង។

ទោះបីជាចូលរួមក្នុងការប្រកួតប្រជែងយឺតជាងគូប្រជែងអាមេរិក រួមមាន Tesla, Boston Dynamics និង Figure AI អ្នកជំនាញបាននិយាយថា ក្រុមហ៊ុនចិនកំពុងបិទគម្លាតយ៉ាងលឿន។ ជាមួយនឹងសមត្ថភាពរបស់ពួកគេក្នុងការធ្វើឱ្យប្រសើរឡើងនូវខ្សែសង្វាក់ផ្គត់ផ្គង់ និងកាត់បន្ថយថ្លៃដើម ក្រុមហ៊ុនចិនក៏កំពុងពន្លឿនការផលិតជាទ្រង់ទ្រាយធំនៃមនុស្សយន្តផងដែរ។

• ការដេញតាមទាន់

ប្រទេសចិនបានគ្រប់គ្រងទីផ្សារសម្រាប់មនុស្សយន្តឧស្សាហកម្មរួចទៅហើយ ដោយពង្រាយមនុស្សយន្តទាំងនេះរៀងរាល់ឆ្នាំចាប់តាំងពីឆ្នាំ២០២១ ច្រើនជាងបណ្តាប្រទេសទាំងអស់រួមបញ្ចូលគ្នា យោងតាមសហព័ន្ធរ៉ូបូទិចអន្តរជាតិ ដែលជាអង្គការមិនមែនរដ្ឋាភិបាលមានមូលដ្ឋាននៅប្រទេសអាល្លឺម៉ង់។

បើប្រៀបធៀបជាមួយមនុស្សយន្ត មនុស្សយន្តឧស្សាហកម្មជាទូទៅមានបច្ចេកវិទ្យាទំនើបតិចជាង និងបំពេញកិច្ចការតិចជាង។ ពួកវាត្រូវបានប្រើយ៉ាងទូលំទូលាយក្នុងបរិបទឧស្សាហកម្មសម្រាប់ការផលិត ឬការដឹកជញ្ជូន។

ដូចជាករណីរថយន្តអគ្គិសនីដែរ ក្រុមហ៊ុន Tesla គឺជាក្រុមហ៊ុនចម្បងមួយក្នុងចំណោមក្រុមហ៊ុនឈានមុខគេពាក់ព័ន្ធនឹងមនុស្សយន្ត នៅពេលដែលលោក ម៉ាស បានណែនាំគម្រោងនេះក្នុងឆ្នាំ២០២១ និងបានបង្ហាញគំរូ Optimus មួយឆ្នាំក្រោយមក។ ចាប់តាំងពីពេលនោះមក ទីក្រុងប៉េកាំងបានបង្ហាញជាសាធារណៈថា ខ្លួនគាំទ្រឧស្សាហកម្មរ៉ូបូទិចមនុស្សយន្ត ជាមួយនឹងការបង្កើនមូលនិធិ និងការគាំទ្ររបស់រដ្ឋាភិបាល៕
ប្រភព៖ CNN